ZORAMA KRISMAS CAROL HMASA BER CHU

Carol tih thumal hi Dictionary lama a awmzia kan hmuhdan chuan ‘Sakhaw lam hla/Pathian fakna hla, Krismas hunlaia miin an sak thin’ tihna emaw, ‘Krismas Hla’ tihna emaw a ni mai a. Awmze dangte phei zawng a nei thei ang. Hlim taka Sava hram lauh lauh ri te pawh hi Carol an ti ve chawk. Carolling tih anih chuan ‘Carol an sa a...” tihna a ni ang a. Kan ngaihsan American ho khuan Carolling/Carolled ti lovin Caroling/Caroled (‘l’ double lovin) an ti deuh. Keini Mizote chuan, “Carol kan sa a. Kan hlim hle mai,” kan ti kher lem lo. “Kan Carol a...” kan ti sam mai a. Chu chu, “Krismas laiin zaiin khawlai kan fang a. In hrang hrangah te pawh kan lut lawr a. Vehbur khawn pah chungin hlim takin, Krismas hla sain kan zai a ni,” kan tihna a ni ber. A tihphungah ngawt chuan khawthlang ho tihdan nen a tir atangin a danglam tehchiam lova. Amaherawhchu, Carol tih thumal hrim hrim kan hmandan leh an hmandan erawh a inang lo deuh a ni. Engpawh chu ni sela, kan hrethiam hle tho ani lawm ni? Tunlaiah chuan ‘Khawn’ chunga Carol lovin, ‘Pe’ chhuaka Carol te pawh kan ching ta deuh deuh anih hi.

Zotlangsanga Krismas Carol hmasa ber neih kum tak hi mi tam zawkin kan chiang ta vak lo a ni awm e. Krismas boruak inlumlet vel karah hian i han sawithar leh teh ang.

Aizawl khuaa venghlun berte zing pakhat chuan 2005 khan an veng Kum 100 tlinna an lawm a. Chumi hriatreng nan chuan Souvenir chikhat atan lehkhabu tha tak an tichhuak a. Chu Souvenir-ah chuan heti hian a inziak a, “Kan veng hi Mizoram pumah Carol lo chhuah tanna a ni an tih tlat chu!... 1949 ah chuan Krismas Carol chu neih a ni a... kan veng nula leh tlangval bakah Mission Veng leh Kulikawn tlangval 10 lai an tel ve...” tiin. Thlalak hlui lama a landan chuan vengdang tlangval zingah hian Pu R. Zuala te, Pu V. L. Lawma te, Pu L. Pachhunga te bakah Pu V. Rosiama te pawh an tel a ni.

Hmanah, kum tam tak liam ta, 1926 khan Kulikawn pa hrat khawkheng Pu Telela leh a thiante, mi 7 ten ‘Zoram Thawvenna’ atan British sorkar lakah ngawhngawl chhuahin Jail bang an lo zut phah hial a. He an thiltih namenlo tak avang hian Kulikawn Pasaltha Chawimawitu Committee chuan October 18, 2006 khan Hriatrengna Lung an phun a. Souvenir atan Kulikawn Arsi Eng tih bu an tichhuak bawk. He lehkhabuah hian Zorama Carol hmasa ber chungchang chu heti hian a inziak thung a, “Central YMA (YLA?) chu Christmas Carol nei hmasa ber Mizoramah chuan an ni a. 23.12.1939 zanah Pu Lalkailiana (Pu Lalkailuia?), Pu Sainghinga, Pu Buchhawna, Pu Pachhunga, Pastor Thanga, Pu Dahrawka, Pu Hrawva leh Pu Makthanga te inah kan zai a ni,” tiin.

Amaherawhchu, 1949 a Carol leh 1939 a Central YLA Carol aia hmaah hian Zorama Krismas Carol hmasaber chu 1933 Krismas khan Rev. P. D. Sena hovin an lo nei tawh a ni. He Carol hmasa ber chungchang hi Upa Chawngzika khan heti hian a sawi a, “Pi Zaii hovin Mizo Zaipawlte chu 1933 khan Lahore-ah kan kal a. He Zaipawlah hian telve ngei turin Rev. P. D. Sena pawh kha a inbuatsaih a. Lahore Zaipawlah hian ani kha Conductor turte zinga mi a ni nghe nghe a. Amaherawhchu, hetih hunlai kher hian a nupui chu a damlo ta tlat mai a. Tin, a fanu upa ber pawh a nuamsam vak lo bawk a. Chutiang chu anih avangin a kal ve thei ta lova ni. Tichuan, ani khawhar leh lungleng chuan thian thenkhat te a lo sawmkhawm a, an zaiho ta a. Chutia an zai chu an zai phur chho zel a, sapho leh chutih hunlaia Mizo milian leh mitha deuhte inah kalkualin, vehbur khawn chungin an lo Carol ta a ni,” a ti. Upa Chawngzika’n, “...a hunlaia Mizo milian leh mitha deuh...” a tihte hi Pu Pachhunga te, Pu Makthanga te, Pu Sainghinga te, Pu Buchhawna te leh midang dangte an ni.

He Carol-a an thilpek tlingkhawm hian Mission Veng Biak In Gate Pillar chu an siam ta nghe nghe a. Pu Thanseia sawihmangin he Gate hi Biak In Pui Gate hnunglam a ni nghe nghe awm e.

Upa Chawngzika’n a sawi zel danah chuan, “Zoram hmarlamah leh chhimlamah pawh ka hriat chinah hei aia hmasa hi a awm thei lova. A kum lehah te, a kum kum lehah te chuan hmun dang dangah Carol hi an ching chhunzawm ta hle zel a ni,” a ti. Zorama Krismas Carol hmasaberah hian ‘Chanchin Lawmawm Angelho Thu Ngai Ru’ tih hla bakah hla dangte pawh, a sap hlain an sa niin Pu C. Vanlallawma chuan a sawi.

He Carol-ah hian tute nge tel? A huaihawttu Rev. P. D. Sena bakah khan Upa D. Thianga, Mission Veng leh Pu Hrangaia, Rahsi Veng (Thakthing Veng) te bak midang telve te erawh hriatchhuah an awlai ta lo hle. A hrechiang ten mual an liam zo ta a ni awm e. A la han hre awm deuh turte pawhin an hre ta tlat lo mai a. Lo hre mial kan awm anih chuan han ziak ve teh u.

Member 49 awmna (Rev. P. D. Sena nen chuan 50 an ni) Lahore Zaipawl-te hian India ram fang turin November 15, 1933 zingkar khan Aizawl an chhuahsan a. Ke in Sairang an thleng a. Tlawng dung zawhthla turin a alto-ho zawng chu lawng pakhatah an chuang a. A air (soprano) ho lawng pakhat dangah an chuang bawk a. A bass leh tenor-te lawng pathumah an inhnawh a. Pi Zaii erawh zaipawl member pakhat nen lawng pakhatah an chuang thung a, Lalaghat thleng an inkar thla ta a ni. Chuta tangin Badarpur-Chandpur-Brahmaputra thlengin an kal zel a. Brahmaputra atangin Meilawng (Steamer) in West Bengal (Gualanddowk) an pan a. Heta tang hian November 20, 1933 zan dar 8:00-ah Relin Culcutta-a Sealdah Station an thleng ta a ni. Lahore Zaipawlte hian khawpui hrang hrang 16 ah zaiin rawng an bawl a. Sap hlabu Holy City leh Messiah hlabua mi hlapui chi hrang hrang — Halleluia Chorus, The Glory of The Lord, Worthy Is The Lamb tih hlate an sak bakah Mizo hla — Ka Ralthuamna Ka Dah Ngam Lo tih leh Ka Damlai Thlipui A Ral Hunin tihte an sa a ni.

Rev. P. D. Sena hi a hmingpum chu Pangdailova a ni a. A naupan laia a nu leh pate kohduatna — Sena tih chu a hming tak angin a pu hlen ta a. Cherra Theological College-ah Pathian Thu (Advanced Course) a zir zawh hnuin, Sub-Inspector of Schools hna thawkin Mission Vengah a inbengbel a. Tirhkoh Muka inhmun hi a in dinna thin a ni. Zorama Krismas Carol hmasa ber an huaihawt kum, 1933 hian Assembly Inkhawmpuiin Pastor atan an la nghe nghe a. 1934 ah Durtlang Biak Inah nemngheh a ni.


— Rochamliana, Mission Veng