SAPTAWNG AVANGA KA ZAHNA!

Kan chenna khawvel hi Saptawng Khawvel a lo ni ta. Saptawng tel miah lo chuan eng huangah mah hian ‘Sera mu a thur’ theih ta lo a ni ber mai. Tin, saptawng hi ka pianpui tawng alo ni lo lehzel vei nen, a kilkhawr leh a lairil thuk tak thleng a hrethiam leh hmangthiam ziazang chi phei chu ka ni lo lehzual a. Chuvangin, keini ang hi chuan Saptawng Khawvelah hian Saptawng avanga zah em em na hi tawk deuh ut reng mai pawh ni ila thilmak anih awm loh hle laiin, ka hawl chin a zim aleiah rinai tak chuan tawk tlem ka la inti ta zawk a. A vanneihthlak hle!

ZAH VAWIKHATNA
Engpawhnisela, Saptawng avang liau liau hian tum thum chu tihtakzetin ka lo zak ve tawh. Saptawng avanga ka zahna hmasa ber chu Dawrpui Kohhran Committee Room-ah a ni a. BA result ka nghah laiin Dawrpui Kohhranin an Kohhran School a thawk turin zirtirtu an la dawn a. Chu hna chu ka va dil ve a ni. Ka damchhunga a hmasa ber atan hnalak chungchanga Interview Board ka hmachhawn tur chu ka han zam nasa khawp a. Ka zam nasat dan chu sawifiah vak ngaihna a awm lo. Vawi tamtak ka zun sek hnuin ka hun a lo thleng ve ta a. Zun a rawn chhuak leh nghal ngut ngut tho! Thin a phu pawng dawt dawt a. Mitmeng a phelh ruai a, khawhmuhte pawh, — diktak chuan, a fiah hranpa lo ani tih chu step mam tha lai tak ka rahpial tak tlat avangin a chiang reng mai. Kawngkhar ka han hawng khur dar dar a. Luh veleha chham tura ka lo vawn sa ran ran chu chhamchhuah tuma ka inhampuar vel lai takin kawngkhar hnuailam za chu ri fawk khawp a nain ka han chhuih leh ta a! Zawhna tam pawh min zawt hmanin ka hre lo. Pangngai tak chuan ka chhang ve zel chuan ka inhre ringawt a. Chutah, Upa pakhat chuan, “Lal Biakna tawngtaina a ‘I hming zahawm rawh se...’ tih hi saptawngin engtinnge ni ang?” a han ti a. Kei chuan rang fahranin, “Thy Kingdom come...” ka han ti ta rup mai ani! Min zawttupa chu a nui kiai suk mai. “A tawk e, a tawk e...” an ti ta ruai mai a.

Ka chhanna dikloh rapthlakzia chu pawn ka chhuah tirh chuan ka la hre mai lo lehnghal a. Phurrit hrawl fahran paihbo tehchawkah ka inchan a. Thaw hawk hawk chungin Bazar pheiah ka kal phei vel a. Interview lam rilruah a la lut hleithei lo. Bazar Bungkawn vel atangin thluak a fim tan a. Lal Biakna chungchanga ka chhanna dik lohzia chu thawklehkhatah ka hrechhuak ta phut mai a ni. Ka ngaihtuah nasat poh leh ka zak tawlh tawlh mai a. A va han manganthlak tehreng em! “Ka va let leh ang. Ka va hrilhfiah hlawm dawn...” te ka han ti rilru ut ut vei thin a. “Dawrpui Upa ho chuan mawl min va ti dawn em!” ka ti a. Kilkhata Upa Rokamlova lo thu nui vur mai hmelte chu mitthlaah a rawn inlar tak zut zut a! Eng engemaw chu ka inngaihbel ta zel mai a. Ka inngaihtuah thinrim ta a ni. Mawl min tih leh tih loh pawh hre uk si lo khan, “An mi ngaih anga mawl chu ka ni bik lo,” te ka ti! Min han lak dawn loh chian vei nen, “Min la mahse, ka thawk lovang!” te ka ti thul! “Dawrpui Upa ho hi a mal malin Lal Biakna hi Saptawng baka Grik tawngin in ka la chhamkhum vek ang,” te ka ti! Tichuan, min hriatzui phei zawng ka ring hauh lo naa, tunthleng hian kha zawhna min zawttu Upa leh Upa Rokamlova te hi ka hmuh chang chuan ka la zak ru deuh reuh reuh thin!

ZAH VAWIHNIHNA
Saptawng avanga ka zah vawihnihna pawh hi tawngtaina lam thil bawk a ni a. Mission Vengthlang Kohhran Hall-ah a ni thung. North East India Christian Council Youth Assembly (NEICCYA) Inkhawmpuiah Palai ka ni ve naa, ka titha peih lo angreng khawp mai a. Rorel inkhawm chawhma lamah chuan report pek turte ka neih ve avangin ka tel tluan hram a. Chawhnu lam chu ka bo leh daih a. Zan lam pawh inkhawm ka tum hran lo. Amaherawhchu, rilru a inthiam hlei thei lova. Chuvangin, tlai fahranah hmanhmawh rilru fe siin ka thleng thla a. Inkhawm an lo tan der tawh a. Tlar hnung berah emaw, a dawttuah emaw tal thut a, duh huna puhbo leh mai tum rilru tak chungin ka han dak dek dek a. Mahse, thutna a lo khat vek tawh mai si a. Tichuan, khualchhawn thothang tha zet mai chuan mipui rehthup tawh karah chuan min hruai min hruai a, tlar hmasa langsar lai tak maiah min han nghat ta a ni. Lai deuh takin thuthmun ka remfel a, ka han hawichhuak leh chiah tihah chuan inkhawm hruaitu chuan kan zavaia aiawha tawngtaina hun hmang turin min han sawm ta thut mai a nih chu! Ka va han haw mai mai tak em!

Dawhsan atang chuan ka han thlirthla a. Mipui an tam kher mai. Hmelhriat, hmelhriat vak loh leh hmelhriat reng reng loh, a zo a vaiin an inthutpawlh nuk mai a. Kan dopui (Salvation Army) Tawtawrawt Pi leh Pu ho pawh tlar hmasa lamah chuan an thuam famkim nen an lo thu tle ver vur mai bawk a. Rilru a inpeih lo nasa a, zamawm tak a ni. Mizo tawnga tawngtai tur pawh nise ka chham buai fe na turah chuan saptawngin eng eng emaw chu ka han chham chho ta nawk nawk a. A bul lam chu a mar tha ve viau naa, rilru lam lo chiai deuh bawk nen, engemaw chen atang chuan ka haihchham titih ta a! Chuvangin, arang aranga tihtawp vat mai kha tha berin ka hre ta a ni.

Awm a nuam lem lo viau mai! Inkhawm banah chuan Synod Zaipawl lama kan thiannu pakhatin min rawn chibai a, “I titha khawp mai,” min ti! Awm a ti nuam chuang miah lo. Ka inngaihtuah lungpuam leh ta pek a. “Saptawnga tawngtai te chu vawitam vawitam ka lo ti ve tawh a, zanin ang ngawt kha chu ka ni bik lo,” ka ti a. Kan lehkha zir laia Evangelical Union (EU), University Evangelical Graduate Fellowship (UEGF) bakah Presbyterian Youth Fellowship (PYF) tih velah te a ka tawngtai zozai(!) te kha ka han ngaihtuah chhuak thar vel zur zur a! Awmzia erawh a nei chau viau. Ngaihtuahna rau tak a ni hran lo! “Naga Service lamah te pawh thu min sawitir thin a. Ka thusawi zawhah te pawh duah deuh fein ka lo tawngtai ve tawh thin...” te ka ti rilru ta vel zel a. Naga Service sawi takah chuan, — Naga thian leh ‘engemaw-laia-thian-aia-thuk-zawk-i’ avang khan an inkhawmna a va tel ve zeuh zeuh leh vawi 2/1 thusawi tura min sawmna han tihhlawhtlin a, han inlak vai tingtang vel kha ka tan thil hrehawm lutuk a ni fahran lo!

— Rochamliana, Mission Veng